News updated on: 05 March 2006

HOME -> NEWS -> NEWS FROM NEPALI DIASPORA AROUND THE WORLD

मस्कोमा नेपाली कार्पेटको बृहत प्रदर्शनी सुरु

नेक सम्वाददाता - 01/03/2006

मस्को । रसियन फेडेरल ऐजेन्सी अन कन्स्ट्रक्सन एण्ड इन्टरनेशनल (Russian Federal Agency on Construction and International) को सक्रियतामा मस्कोको सोकोलनिकीमा १४ औं अन्तरराष्ट्रिय निर्माण हप्ता International Construction Week ( MVK ) को आयोजना भएको छ । उक्त प्रदर्शनी फागुन १७ गते देखि २० गते (फेब्रुअरी २८ देखि  मार्च ४, २००६) सम्म संचालन हुने भएको छ । यस प्रदर्शनीमा नेपालका कम्पनीहरु लगायत ७०० भन्दा बढी कम्पनीले भाग लिएको छ । यस प्रदर्शनीमा अनमोल इन्टरप्राइजेजका डा. ऐक नारायण चापागाई र बद्री के. सी. ले Elite Nepalese Carpet को नाममा नेपाली कार्पेट प्रदर्शनीमा राखेका छन् । अजरबैजान, युक्रेन र इरानका कार्पेटहरु पनि उक्त प्रदर्शनीमा रहेको छ ।   मस्कोका लागि शाही नेपाली राजदूत महामहिम श्री हिरण्यलाल श्रेष्ठले आज उक्त प्रदर्शनीको अवलोकन गर्नु भएको थियो । उहांले नेपाली कार्पेटको प्रदर्शनी गर्नु भएकोमा अनमोल इन्टरप्राइजेजका डा. ऐक नारायण चापागाई र बद्री के.सी. लाई हार्दिक धन्यवाद दिदै नेपालसितको व्यापार र संयुक्त लगानी प्रवर्द्घनमा जोड दिनुपर्ने बताउनु भयो ।   उक्त इन्टरप्राइजेजले हाल नेपालको रोल्पा र पतान्जली कार्पेट कम्पनीवाट कार्पेट आयात गरी मस्कोको १४ वटा पसलहरुमा नेपाली कार्पेट विक्रीको लागि दिएको जानकारी दिनु भएको छ । साथै यस प्रदर्शनीमा जर्मनी, बेलारुस, काजाकिस्तान, युक्रेन, लात्भिया, लिथुवानियाका जनताहरुले नेपाली कार्पेटको सम्वन्धमा ज्यादै अभिरुची लिएको बताएका छन् । मस्कोमा पुराना घरहरु विक्रीको लागि विज्ञापन गर्दा नेपाली कार्पेट समेत रहेको घर भनी विज्ञापन गरेको पाइएकोले नेपाली कार्पेट रशियनहरुले मन पराउने बुझिन्छ । जर्मनबाट रुसमा नेपाली कार्पेट ल्याएर विक्री वितरण पनि गर्दै आएकोमा हाल क्रमशः नेपालबाटै सिधा व्यापारिक कारोबार बढाउदै लगेका छन् ।   गत असार २८ र २९ गते शाही नेपाली राजदूतावास, मस्कोमा नेपाली कार्पेट र पश्मिनाको प्रदर्शनी भए पछि सोही प्रदर्शनीवाट प्रभावित भै नेपाली कार्पेटको बजार मस्कोमा लिन सकिने भएकोले कार्पेट व्यापार शुरु गरेको जानकारी उक्त इन्टरप्राइजेजले दिएको छ ।

 

	©nepalqatar.com