News updated on: 19 November 2006

HOME -> NEWS -> NEWS FROM NEPALI DIASPORA AROUND THE WORLD

साउदी अरबबाट नौ युवतीको उद्धार

कान्तिपुर दैनिक/सुरज कुँवर  - 19/11/2006

काठमाडौं, मंसिर २ -  रोजगारीका लागि साउदी अरब गएका ९ नेपाली युवतीलाई त्यहाँ रहेको नेपाली संस्थाले उद्धार गरेर स्वदेश फर्काइदिएको छ ।   रियादस्थित एउटै बन्दीगृहमा छ महिना कठोर यातना खेपेका उनीहरू प्रवासी नेपाली संस्था 'प्रवासी नेपाली नेटवर्क परिवार' को सहयोगमा र्फकन सफल भएका हुन् । त्यहाँ अझै २१ युवती नारकीय जीवन भोगेर बसिरहेको उनीहरूले बताए । तीमध्ये वीरगन्ज घर भएकी रमा सुनारको अवस्था चिन्ताजनक रहेको उनीहरूले बताए । पाठेघरकी बिरामी उनलाई उक्त सरकारी बन्दीगृह प्रशासनले उपचारसमेत गराएको छैन ।   त्यहीँ रहेकाहरू खर्चको अभावमा छन् । त्यहाँको नेपाली दूतावासले पहल गरेर उनीहरूलाई फर्काउनुपर्ने फर्केकी एक युवतीले माग गरिन् । बन्दीगृहमा रहेका अधिकांश घरेलु कामदार हुन् । उनीहरू घरमालिकको यातना र शोषण सहन नसकेर प्रहरीमार्फत बन्दीगृह पुगेका हुन् ।   राम्रो रोजगारी लगाइदिने प्रलोभन दिएर भारतको मुम्बई र दिल्लीबाट एक वर्षअघि साउदी अरब पुगेका यी युवती १७ देखि ३१ वर्षसम्मका छन् । तीमध्ये ३ अविवाहित र ६ विवाहित हुन् । उनीहरू बर्दिया, दाङ, कपिलवस्तु, रूपन्देही, कास्की, स्याङ्जा, सुनसरी र झापा घर भएका छन् । घरमालिकको शारीरिक, मानसिक शोषण, सर्तअनुसार ज्याला र सुविधा नदिएपछि केही भागेर र केही घरनिकाला भएर रियादस्थित नेपाली दूतावासको शरणमा पुगेका थिए । दूतावासले स्वदेश फर्काउन नसक्ने जनाउँदै उनीहरूलाई स्थानीय प्रहरीको जिम्मा लगाएको र प्रहरीले वलाइयास्थित बन्दीगृहमा पठाएको पोखराकी एक युवतीले बताइन् ।   सरकारले खाडी मुलुकमा नेपाली महिला कामदार पठाउन रोक लगाएकाले भारतीय दलालमार्फत उनीहरू खाडी मुलुक गएका हुन् । बुधबार बिहान एयर अरबियाको उडानमा दुबईको सारजाहा हुँदै बिहीबार साँझ त्रिभुवन विमानस्थल उत्रिएका ती युवतीलाई माइती नेपालले जिम्मा लिएको थियो ।   रियादस्थित नेपाली दूतावासले भने शुक्रबार विज्ञप्ति प्रकाशित गरी ती युवती दूतावासकै सहयोगमा स्वदेश फर्केको दाबी गरेको छ ।

news from nepal   nepalnews   information from nepal   nepal    nepali   nepallinks   news nepal

 

	©nepalqatar.com